اهلا بكم في شبكة فلسطين نت

القائمة

الرئيسية
تاريخ فلسطين
اغاني فلسطينية
معجم بلدان فسطين
تراث
شعر
النكبة
رسوم
بوسترات
طوابع
بطاقات بريدية
العملات الفلسطينية
مخيمات
وثائق
شعر مسموع
المكتبة
حق العودة
نشأت مدينة القدس 
بور بوينت
ادباء من فلسطين
 

 
 
 
 
 
 
 
 




 

قصص من التراث الفلسطيني

المصدر: الانترنت

من قصص التراث الشعبي الفلسطيني
قصة :
نص نصيص
بقلم الكاتب :
 
كان يا ما كان في قديم الزمان ,كان في هالزلمه,متجوز نسوان ثنتين,وحده منهم بنت عمه والثانية غريبة,والثنتين بحبلنش.قال بدي أروح على هالشيخ بلكي على الله انه يعطيني دوا لهالنسوان .

راح الزلمة عالشيخ وقاله:"بدي منك دوا بخلي نسواني يحبلن ." قاله الشيخ :"بتروح على الجبل الفلاني بتلاقي هناك غول ,بتقوله )بدي حبتين رمان اطعمهم لنسواني على شان يحبلن,) وشوف شو بقولك."
راح الزلمه ,اجا على هالغول , دغري هد عليه حلقله لحيته , وقصقصله حواجبه, وقاله:" السلام عليكم".قاله الغول:"عليكم السلام. لولا سلامك سبق كلامك كان خليت اخوي اللي في الجبل الثاني يسمع قرط عظامك .شبو بدك؟" حكاله. قاله الغول :"روح على الجبل الثاني بتلاقي اخوي الكبير بتسأله,بدلك." راح عالجبل الثاني , لاقى هالغول وعمل مثل ما عمل لاخوه وقاله: "السلام عليكم ". قاله الغول " وعليكم السلام .لولا سلامك سبق كلامك كان خليت أختي اللي في هظاك الجبل تسمع قرط عظامك . شو بدك؟"حكاله . قاله:" روح عند اختي على هظاك الجبل بتدلك."

راح ,لاقاها قاعده, قالتله شو بدك ؟"قالها: "بدي حبتين رمان أطعمهم لهالنسوان على شان يحبلن ."قالتله:"بتنزل على هظاك البستان بتلاقي غول نايم , ذان فرشة وذان غطا . بتقطع حبتين رمان وبتشرد. "سوا الزلمه زي ما قالتله الغوله, وروح.اهوته في الطريق , جاع قال: "بدي اوكل من حبة بنت عمي لانها بتزعلش علي ابتقبل مني نص حبة . "فلق حبة واكل نصها . لما روح عالدار اعطى المره الغريبة حبة رمان , واعطى بنت عمه نص حبة.

حبلن الثنتين مع بعظ . المره الغريبه جابت توم اولاد, سمى واحد"حسن" وواحد"حسين". وبنت عمه جابت نص بني ادم سماه "نص نصيص". وكبروا الولاد .يوم قالوا لأبوهم : بدنا نسرح عالصيد والقنص. "حسن وحسين قالوا بدهم كل واحد فرس وبارودة. وافق ابوهم وأعطاهم. نص نصيص قال:"بدي سخلة جربة, ومقحار طابون."جابوله زي ما طلب.
وسرحوا. صاروا حسن وحسين يطخوا في البارود وما يصيدوش ولا اشي. نص نصيص ينام عالأرظ ويخلي الغزال وهو ماشي يضربه على اجريه ويكسرله اياهم. اخوته قالوله: " اعطينا الغزلان الي صدتهم تنروحهم ونقول احنا صدناهم". قالهم: " على شرط، بسخن الختم تبعي وبختم على الغزلان علامه". قالوله: طيب.
روحوا على الدار واعطوا الغزلان لامهم . امهم طبخت ورمت عظامهن باب دار نص نصيص. صارت ام نص نصيص تعيط. شافها نص نصيص. قالها : " ليش بتعيط ؟" قالتله: "بحر، اخوتك حسن وحسين بيصيدوا الغزلان وانت لأ. " قالها: " وهم الي بيصيدوا؟ روحي شوفي ختمي على كل غزال." فرحت امه وشافت الختم.
ثاني يوم، سرحوا عالصيد غابت عنهم الشمس وهم بعاد عن البلد .اجوا على هالبلد مالقوش فيها الا هالغولة بتطارد ورا ديك . لمن شافتهن صارت تقول: "اهلاً وسهلا يا ولاد اخوي. "ربطت خيلهم وهالسخلة في باب هالدار فوتتهم وعملتلهم عشا وعشتهم. قالتلهم: "شو بوكلن خيولكم ؟ "قالولها: "شعير محسك وحليب صافي . "حطتلهم. قالت لنص نصيص: "شو بتاكل سخلتك؟ "قالها : "نخالة وميه وعجين". حطتلها.
فرشتلهم ميشان ينام . حسن وحسين نام على المصطبه. نص نصيص قالها : "انا ما بقدرش انام على المصطبة. "في قرطلة معلقة في سقف البيت. قالها : "انا بدي انام في القرطله , بس اعطيني كبشة فول وقربة مي . "خزق هالقربة خزق صغير وعلقها فوق راسه, صارت تنقط على راسه وقعد بهالقرطلة وصار يقرش بهالفول. الغوله فكرتهم نايمين . صارت تقول: "يا اسناني امظين , امظين , على حسن واخوه حسين ."عاد نصن نصيص فايق وسامعها . صار يقول: "كيف انام وكيف انام, وبطني خالي من الطعام؟ "قالتله الغولة: "شو بدك توكل؟ "قالها :"بدي ديك محشي اوكله وانام."
سوتله هالديك ."اكله, راح ينام. رجعت الغوله تقول: "يا اسنيناتي امظين , امظين , على حسن واخوه حسين . "قام نص نصيص قال: "كيف انام وكيف انام وبطني خالي من الطعام؟ "قالتله : "شو بدك توكل؟ "قالها: "بدي خروف محشي محمر ومقمر, اوكله وانام".
ما سويت الخروف وخلصت,الا هي الشمس طالعة.قالولها: "بدنا مي منشان نغسل. "راحت تجيبلهم ميه , وهو قلهم : "ولكم قوموا, هذي غوله . "قاموا, ركبوا, وشردوا . ولما رجعت لاقتهم شاردين , لحقتهم .يوم ما شفتهم صارت تقول: "يا حليب روب روب واربط جرين خيلهم في الدروب! " اوقفنا خيلهم, اعيين يمشين .دشروهن وركبوا ورا اخوهم نص نصيص على السخلة العرجه. وصار نص نصيص يظرب هالسخله بهالمقحار ويقول: "يا صوان اقدح , اقدح, ويا نخله طيري , طيري. "طارت سخلته وأوصلتهم لدارهم , والغوله لحقت الخيول وأكلتهن.
انبسط ابوهم من نص نصيص اللي انقذ اخوته من الغولة. قالهم نص نصيص: "واللي يجيبلكم الغولة لعندكم ؟"قالوله:"اذا بتقدر,بنقر وبنعترف انك اشطر من اخوتك الاثنين."
راح نص نصيص اشترى هالحمار وحمل عليه هالصندوق ,وملاه حلاوه مطاطة . يوم ما وصل دار الغوله , صار ينادي : "هاي الحلاوه! هاي الحلاوه! طلعت الغوله, قالتله:"بقديش"؟ "قالها مثل ما تقول: "الاوقية بقرش. "اكلت اوقية ,اوقيتين. ثلاثة. ما شبعتش . قالها: "شو رأيك تطيحي في الصندوق وتوكلي قد ما بدك وبعدين منتحاسب ؟ "وافقت وعبرت في الصندوق . أهو قام سكر باب الصندوق بهالجبل ومكنه, وصار يمشي تنه وصل بلده والغوله ملتهيه في الاكل .يوم ما أوجه على بلده صار ينادي: "اوقدوا النار وعلوا شعالها , جبتلكم الغوله بحالها ! واللي يحب النبي يجيب حزمة حطب وبصة نار!"
قالتله الغوله: "شو بتقول؟"
قالها: "بقولافردوا حرير وظبوا حرير,جبتلكم الاميرة بنت الامير ؟) "يوم ما صارت النار كبيرة دبوها هي والصندوق في النار وتخلصوا من شرها.
وطار الطير ,وتتمسوا بالخير.

 

 
 
 

اغاني

زياد الرحباني
امل مرقص

مكادي نحاس
زين الملاحم
اغاني المخيمات
سميح شقيرقيثارتان
الثلاثي جبران
النشيد الفلسطيني
مارسيل خليفة
ميس شلش
جوليا بطرس
خالد الهبر
احمد كعبور
عبد الله حداد
اغاني المدن الفلسطينية
ابونســرين
اميـمة
سميح شقير
ابو عرب
 

 
 

خدمات

اخبار
اخبار
bbc
ترجمة
كيبورد
الأنترنت والدردشة والرسائل
خرائط جوجل
تحويل عملات
بحث مع ترجمة لعدة لغات

 
 

برامج

برامج الشات

مكافحات الفيروسات

محولات الصوت و الفيديو

متصفحات الانترنت

برامج تحميل

مشغلات الصوت و الفيديو

 
 

روابط


The International Solidarity Movement
Palestinian nationalism